Bore Lente

 Bore Lente

(o siad)

Salvatore Demurtas

Nato a Teti 25-12-1921

Res.Genova

 
 
Sa vida de prima
 
Piloccos accurziae
A intender custu gontu
Dae chimbant’annos prontu
In attesa e ddu gontare
 
Si chereis zudicare
Forzis non pos pared beru
Ma boddu nao sinzeru
No est un’istrampalada
 
Sa vida nosta colada
Send’in sos teneros annoso
Finzas como sende mannoso
DDa tenemus galu in mente
 
Biviad male sa zente
C’aiad troppu miseria
Ecun cussa cattiveria
Su morale fud a zero
 
Po dogni vivente ispero
Non torred cussa tristura
Po tottus pesante e dura
E cun pagu nutrimentu
 
Mancu su trinta po ghentu
Che ud-de su neccessariu
No esistiad salariu
E nemancu penzione
 
Dogni popolazione
Cussu drama ddu subiada
E impotente assistiada
Agussa pressante morsa
 
Senza peruna risorsa
Po supravivere in gherra
Su chi rendiad sa terra
Non nos podiad nutrire
 
E finzas pagu bestire
Ca s’istofa costaiada
E dinare non c’aiada
Po dda poded comporare
 
Si deviana arranzare
Tottus comente podiana
Sos piloccos nos bestiana
A s’usanza e gussa muta
 
Un’ipezia e tuta
Po nos parare su vrittu
Zughiad s’isportellittu
A s’ala posteriore
 
Po su piloccu minore
Cando teniad bisonzu
Istade iberru e atonzu
Cun su matessi bestire
 
Finzasa-a cheddu inire
Mai si gambiaiada
E cando si segaiada
Ca beniada acconzau
 
Tando ud tottu tappezau
De c’aspriare sos piloso
E tra zappulos e filoso
Non caiad pantalone
 
Bos faghede impressione
A dd’arrecontare gomo
Ma finzas intro e domo
Fumus pagu a sa zivile
 
Teniamus su oghile
In mesu e sa coghina
Si dromiad a foghina
Fudun-istoia su lettu
 
Bellu solidu e perfettu
Non fud molleggiau certu
Su gabbinetto a s’apertu
Inube caiad logu
 
E teniamus po jogu
Iscoppettes de samucu
S’aperiad unu bucu
Cun bacchettas de linzola
 
Isparande a balla sola
Cun sas ballas de orticu
E su piloccu biticcu
Per forza s’adataiada
 
Ca unu dizu gurriada
Fud s’antiga leonedda
Bogandeche a sennor Sedda
Fumus tott-a un’andare
 
Como devo gambiare
E cricare sos pastorese
Sos mannos e sos minorese
Paschende in su gumonale
 
Sa prima die-e Nadale
Si ettaiad a sinza
Lassaian sa laghinza
In sos pasculos de susu
 
Ca-a cambiare ud-in usu
Ma solu su mardigau
Cand’aian cominzau
A naschire sos anzonese
 
Fun prontos sos malinconese
Murghiana su golostu
E a custumene nostu
Si aghiad sa gasada
 
Si ud discretta s’annada
Si podiad campuzare
Ca caiad de pagare
Costosissima pastura
 
Ca non fud-in procedura
Tando sa legge Cipolla
Bivende a su tiramolla
Prus corzolu chi non chibu
 
Sa Emissone in s’ischibu
Su pane-e orzu aghiana
E in cassia poniana
Su vamosu paneorzu
 
Fud po noso un’iscusorzu
Si ud sa gassia prena
A gustu pranzu e a chena
Fud su pastu dominante
 
Como in su ristorante
Servini su caviale
Però tando ispeziale
Fud su pane cun sisora
 
Chendad de narrer ancora
Ma po un’atera borta
DDu lassamus de iscorta
A un’ateru momentu
 
Po riprender s’argumentu
De sa vida de sos avoso
Piloccos istae bravoso
E trattae su rispettu
 
Cun amore e cun affettu
A sos bostos genitorese
E tra mannoso e minorese
Che siad sa vrattellanza
 
Si teneis abbundanza
Bos prego:non dd’isprecheisi
C’ateros frades teneisi
Chi sa gana sun sufrinde
 
A miliones morinde
Semper azudu invocande
Dogn’alimentu ispetande
Cussa trista zoventude
 
Pregae po sa salude
Ca est sa prus importante
Dogni sudditu o regnante
O erriccu o pedidore
 
Invochen paghe-e amore
Chi mai tenzan tramontu
Po terminare su gontu
Piloccos chi m’iscurtaisi
 
Dogni passu chi ettais
A derettu ddu etteisi
Cando chent’annos teneisi
Siais cun tantu ardore
Che a oe in allerghia
 
Po render sempere onore
A sa Vergine Maria
                           Bore Lente